JXTC Urban Life - шаблон joomla Продвижение

ÆЦÆГ АИВАДЫ БÆРÆГБОН

Автор: Гасанты Валерий
Категория: Искусство Создано: 25.12.2017 18:51
Просмотров: 146

Нæ республикæйы цæрджытæн зындгонд æмæ уарзон у курдиатджын зарæггæнæг, РЦИ–Аланийы сгуыхт артист, Муслим Магомаевы номыл дунеон конкурсы финалист Челдыты Вадимы ном, ирд курдиат æмæ хæдбындур аивад. Уый зары куыд дунеон, уæрæсейаг æмæ ирон вокалон аивады хуыздæр уацмыстæ. Йæ хъуытаз хъæлæсы мыртæ уæлдай ирддæрæй сæрттивынц Советон Цæдисы адæмон артист Муслим Магомаевы репертуары цы диссаджы рæсугъд зарджытæ уыд, уыдон ноджы тыхджындæр æнкъарæнтимæ дзыллæты размæ куы рахæссы, уæд. Вадим былалгъæй æмæ кадмондаджы гаккимæ нæ зары. Сценæйы нырыккон «стъалытæ» æрттиваг хъæндилтау сæхи цы хуызы февдисынц æмæ æхца æлвынæн куыд кæнынц, Вадим, уыцы кадмондаг быдзæутæй нæу. Уымæ гæсгæ рæстæгæй–рæстæгмæ йæ аивадæй, сæрмагонд концерты хуызы, адæмы зæрдæтæ куы барухс кæны, уæд уый вæййы æцæг зæрдылдаринаг цау нæ адæмы царды æмæ аивады.

Ахæм æцæг бæрæгбон Ирыстоны дзыллæйæн Вадим сарæзта æрæджы дæр. Ивгъуыд сабаты Хæххон паддзахадон университеты Культурæйы Галуаны курдиатджын зарæггæнæгæн уыд сæрмагонд концерт. Йæ райдайæны йæ амонæг РЦИ–Аланийы адæмон артист Æлбегты Алан радзырдта Вадимæн нырмæ йæ къухы аивады цавæр æнтыстытæ бафтыд, дарддæр та йæм цы фæндтæ ис, уыдоны тыххæй. Концерты зæлыдысты номдзыд композитортæ Александра Пахмутовайы, Арно Бабаджанианы, Ян Френкелы, Æлборты Феликсы, Бериты Алыбеджы, Сагкаты Валерийы, Гæздæнты Булаты, фыст зарджытæ æмæ вокалон композицитæ: «Нежность», «В нежданный час», «Благодарю тебя», «Нам не жить друг без друга», «Будь со мной», «Позови меня», «Журавли», «Гордость», «Мады ном», «О нана», «Зарæг рагбонты горæтыл», «Кæлæнтæ», «Как молоды мы были», «Пой гитара», «Влюбленный солдат», «Бесаты Мæхæмæты зарæг»… Æдæппæтæй Вадим æмæ концерты иннæ архайджытæ (æрыгон курдиатджын зарæггæнджытæ Хъуысаты Сослан, Дзуццаты Аслан) азарыдысты 22 вокалон уацмысæй фылдæр. Уыимæ куыд уырыссаг, ирон, афтæ фæсарæйнаг æвзагтыл. Куыд концертмейстертæ, афтæ сын хорз æххуыс кодтой Санкт–Петербурджы Римский Корсаковы номыл паддзахадон консерваторийы студент Даниил Свериденко, курдиатджын музыкант, Адæмон инструментты национ паддзахадон оркестры дирижер Къуымæритттаты Тенгиз,(цагъта фæндырæй) æмæ Гуриаты Руслан.

Концерты кæрон Челдыты Вадимæн æмæ концерты иннæ архайджытæн, аиваддуарзджытæн зæрдиаг арфæ ракодта газет «Рæстдзинад»–ы уацхæссæг, УФ–йы журналистты цæдисы уæнг Гасанты Валери. Уый ма бакаст Вадимы тыххæй йæхи фыст æмдзæвгæ.