JXTC Urban Life - шаблон joomla Продвижение

Донарæхæн уæ цард!

Автор: Ада Высоцкая
Категория: Общество Создано: 10.08.2017 22:44
Просмотров: 139

Нуазыны доны фарста хъæуты сæрдыгон тынг риссаг вæййы. Адæм сæ кърæнтытæ ауадзынц цæхæрадæттæм, æмæ уый хыгъд иннæ цæрджытæм дон нал фæхæццæ кæны. Фæлæ куыддæр фæззæг йæ барты бацæуы, æмæ зæхкусджытæ цæхæрадæттæй тыллæг сисынц, афтæ дон дæр фаг бæрцæй ракæлы хæдзæртты.

Фæлæ Црауы Комсомольскаяйы уынджы цæрджыты доны фарста сæрдæй-зымæгæй тынг тыхсын кодта. Уынг уæлæуæз кæй у, уый тыххæй дон хæдзæрттæм нæ хæццæ кодта. Цæрджыты тыхстдзинад ахæм уавæрты æнцон бамбарæн у. Сæхæдæг куыд дзурынц, афтæмæй архайдтой хæсгæ донæй.

Уавæр сраст кæнынæн донцъирæны раз хъуыдис сæвæрын уæлæмхасæн резервуар. Цæрæн бынаты бюджеты уыцы куыстыты фаг æхца нæ уыд.

Адæмы фарн бирæ у. Комсомольскийы уынджы цæрджытæ равдыстой хъæппæрис – сæ фарста рахастой республикæйы разамынды размæ. Республикæйы сæргълæууæг Битарты Вячеслав бафæдзæхста, цæмæй районы разамынд ссара фæрæзтæ, æмæ Црауы цæрджыты фарста лыггонд æрцæуа.

Резервуар сæвæрын йæхимæ райста МУК «Алагиркоммунресурсы». Сæхæдæг ссардтой хъæугæ арæзтадон æрмæг. Къуырийы дæргъы куыстой æнæ фæлладуадзæн бонтæй. Хорз сæм фæкастысты сыхы цæрджытæ Бутаты Аслан, Хъайттаты Хъазыбег, Козаты Аслан æмæ иннæтæ.

Абон Комсомольскаяйы уынджы хæдзæртты дон парахатæй кæлы. Цæрджытæ сты тынг разы.

– Сыхбæсты номæй бузныг зæгъæм Битарты Вячеслав, районы сæргълæууæг Бутаты Арсен, хъæуы администрацийы сæргълæууæг Бутаты Тамерланæн, – зæгъы Гасситы Лизæ. – Æгайтма нæ фарста лыггонд æрцыд. Абон нæ алкæй хæдзары дæр парахатæй кæлы дон. Уæлдай бузныг зæгъæм районы администрацийы цæрæнуæттæ-коммуналон хæдзарады хайады сæгълæууæг Тлаттаты Жаннæйæн. Нæ хъаст, нæ тыхст-иу уымæ бахастам. Бавæрдта нын-иу ныфсытæ, стæй йæ цæст иудадзыг дардта æппæт куыстытæм дæр.

Донарæхæн дæ цард, зæгъгæ-иу афтæ арфæ кодтой нæ фыдæлтæ. Гъемæ уыцы арфæ кæнын, абон махмæ дон кæй руаджы ракалд, уыдонæн се' ппæтæн дæр!

Оставьте свой комментарий

Оставить комментарий от имени гостя

0
Ваш комментарий отправлен на модерацию.
правилами и условиями.
  • Комментарии не найдены